Тошкент филиалида «IT TA’LIM BERISH MARKAZI – USTUDY» қўшма лойиҳасини амалга ошириш доирасида ташкил этилган «Бўлажак IT-мутахассислари учун катта старт!» номли амалиёт дастури муваффақиятли якунланди.
Лойиҳа UZINFOCOM Ягона интегратори, Г.В. Плеханов номидаги Россия иқтисодиёт университетининг Тошкент филиали «BIPU» Инкубация маркази қўллаб-қувватлаши ҳамда филиалнинг Илмий-услубий кенгаши мувофиқлаштируви остида ҳаётга татбиқ этилди.
Лойиҳанинг асосий мақсади — рақамли иқтисодиётнинг жадал ривожланиши ва IT-компетенцияларга бўлган талабнинг ортиб бориши шароитида ахборот технологиялари ва дастурлаш соҳасида рақобатбардош, юқори малакали мутахассисларни тайёрлашдан иборат бўлди.
Амалиёт дастури замонавий IT-индустриянинг учта муҳим йўналишини қамраб олди: Graphic Design, Frontend-дастурлаш (Angular, React) ва Python’да Backend-дастурлаш. Ўқув жараёнида иштирокчилар замонавий рақамли воситаларни ўзлаштирдилар, дастурлаш бўйича амалий кўникмаларга эга бўлдилар ва тажрибали устозлар раҳбарлигида ўз лойиҳаларини яратдилар.
Амалиёт якунида муаллифлик лойиҳаларининг тақдимоти бўлиб ўтди. Унда талабалар олган билимларини, ижодий ёндашувларини ҳамда амалий вазифаларни ҳал қилишда замонавий технологияларни қўллаш қобилиятларини намойиш этдилар. Тақдим этилган ишлар иштирокчиларнинг тайёргарлик даражаси юқори эканлигини ва уларнинг ахборот технологиялари соҳасида кейинги профессионал ривожланишга тайёрлигини кўрсатди.
Дастур якунида барча иштирокчиларга Graphic Design, Frontend ва Backend Development йўналишлари бўйича ўқув курсини тамомлаганликлари тўғрисидаги сертификатлар топширилди.
Талабаларимизни ва аллақачон сертификатга эга бўлган мутахассисларимизни лойиҳанинг муваффақиятли якунлангани билан табриклаймиз!
Лойиҳа битирувчиларига келгуси ишларида зафарлар, янги касбий ютуқлар ва ахборот технологиялари соҳасида ишончли ривожланиш тилаймиз. Олинган билим ва кўникмалар истиқболли ғояларни ҳаётга татбиқ этиш ҳамда рақамли индустрияда муваффақиятли карьера қуриш учун мустаҳкам пойдевор бўлишига ишонамиз.
