Muhim ma’naviy-ma’rifiy va ilmiy voqea – Shahrisabz davlat pedagogika institutida Abdulla Oripov va Qalandar Abdurahmanov nomidagi ilmiy-tadqiqot markazining tantanali ochilish marosimi bo‘lib o‘tdi.
Tadbirda taniqli iqtisodchi olim, Oʻzbekiston va Tojikiston Fanlar akademiyalari akademigi, professor, iqtisod fanlari doktori Qalandar Abdurahmanov, Oʻzbekiston xalq shoirining rafiqasi Hanifa Oripova, taniqli huquqshunos va akademik Akmal Saidov, senator va professor Abdurahim Erkayev, Oʻzbekiston Respublikasi Oliy Majlisi Qonunchilik palatasining Budjet va iqtisodiy masalalar qoʻmitasi raisi, professor Sharofiddin Nazarov, shuningdek, jamoatchilik vakillari, institut oʻqituvchilari va talabalari ishtirok etdilar.
Tantanali marosim ramziy lentani qirqish bilan boshlandi. Mehmonlar yangi markazda yaratilgan sharoitlar, uning ilmiy fondi, adabiyotlar va mavzuli ekspozitsiyalar bilan tanishdilar.
Tadbir ishtirokchilari oldida soʻzga chiqqan faxriy mehmonlar ushbu arboblarning mamlakat ilm-fani, adabiyoti, ma’naviyati va ta’limi rivojiga qoʻshgan ulkan hissasini, shuningdek, oʻsib kelayotgan yosh avlodni tarbiyalashdagi muhim rolini alohida ta’kidladilar.
Markaz faoliyati ilm-fan va ma’naviyat oʻrtasidagi oʻzaro bogʻliqlikni mustahkamlashga, yoshlarning tadqiqotchilik imkoniyatlarini kengaytirishga, talabalar va oʻqituvchilarning ilmiy salohiyatini rivojlantirishga, shuningdek, milliy madaniy va intellektual merosimizni yanada chuqurroq oʻrganishga xizmat qilishi ta’kidlandi.
Tadbir doirasida G.V. Plexanov nomidagi Rossiya iqtisodiyot universiteti Toshkent filiali rahbari va shoirning rafiqasi markaz fondiga qimmatli ilmiy nashrlar, badiiy adabiyotlar va ijodiy materiallarni topshirdilar. Ushbu materiallar markazning ilmiy-ta’lim bazasini muhim qismiga aylanadi.
Yangi ilmiy-tadqiqot markazining ochilishi institutning ilmiy va ma’naviy-ma’rifiy faoliyatini rivojlantirishda muhim qadam bo‘ldi, shuningdek, O‘zbekistonning ko‘zga ko‘ringan arboblari boy merosiga bo‘lgan yuksak hurmat-ehtirom namunasiga aylandi.
