2—6-oktyabr kunlari Toshkent shahrida turli mamlakatlardan kelgan 35 nafar faol, jamoat tashkilotlari yetakchilari va ekologik tashabbuslar vakillarini birlashtirgan Xalqaro ekovolontyorlar maktabi bo’lib o’tmoqda.
Tadbirni ochib berar ekan, filial direktorining o‘rinbosari, professor Nodira Zokirova yoshlarda ekologik tafakkurni shakllantirish, ko‘ngillilar tashabbuslarini qo‘llab-quvvatlash hamda ekologik madaniyatni kasbiy ta’limga integratsiya qilish muhimligini ta’kidladi. U maktabning filial maydonida o‘tkazilishi GreenEcoHub faoliyatining ramziy davomi hamda G.V. Plexanov nomidagi REU Xalqaro iqlim klubi bilan hamkorlikning isboti bo‘lganini alohida ta’kidladi.
Ilmiy-nashriyot bo’limi va filialning ekologik loyihalar koordinatori Barno Sattorova GreenEcoHub faoliyatini tanishtirib, talabalarning xalqaro konferensiyalar va tadqiqot loyihalaridagi ishtiroki, shuningdek, Buxoro, Samarqand va Toshkent viloyatida ekoturizm, ekologik so‘qmoqlar hamda Orol dengizi va Orolbo‘yi muammolariga bag‘ishlangan amaliy seminarlar haqida gapirib berdilar.
Filial talabalari o’zlarining ilmiy tadqiqotlarini ham taqdim etdilar. Xalililloh Ibrohimov qishloq xo’jaligi chiqindilarini materiallar va qadoqlash vositalariga ekologik jihatdan qayta ishlash bo’yicha ma’ruza qildi, Lola Ibrohimova esa Markaziy Osiyoda suv tanqisligi va suv resurslaridan oqilona foydalanish haqida so’zladi.
Maktab ishtirokchilari filial infratuzilmasi hamda shahar ekologik jamoatchiligini rivojlash, ko’ngillilar tashabbuslarini tashkil etish va uzoq muddatli ekologik loyihalarni amalga oshirishning zamonaviy yondashuvlari bilan tanishdilar. Xalqaro maktab ta’lim dasturining birinchi bosqichi bo’lib, uning davomi sifatida ekologik jamoalarni yaratish bo’yicha onlayn-kurs va eng yaxshi shahar ekologik tadbiri uchun tanlov tashkil etiladi.
Loyiha Prezident grantlari jamg’armasi hamda Rossotrudnichestvoning O’zbekiston Respublikasidagi vakolatxonasi ko’magida amalga oshirilmoqda va xalqaro hamkorlikni rivojlantirish, ekologik amaliyotlar almashish hamda yangi qo’shma tashabbuslarni yaratishga qaratilgan.
«EKA» mintaqalararo ekologik jamoat tashkiloti vakillari O‘zbekiston Respublikasi Fanlar akademiyasi akademigi, Toshkent filiali rahbari Qalandar Abdurahmonovga «Xalqaro ekovolontyorlar maktabi» loyihasini amalga oshirishga ko‘rsatgan ko‘magi va qo‘llab-quvvatlagani uchun minnatdorchilik maktubini topshirdilar.
